【Viu】MC張天賦、Gigi張蔓姿、6號@RubberBand、Thor駱振偉噚晚錄影《Chill Club》，是夜再度開放畀觀眾入場，MC同Gigi都嗌緊張呀！笑問MC會唔會學網上短片嘅同學仔，跪地獻唱《記憶棉》益觀眾？佢就話留返適合場地先使出「超咇」，咁係咪等紅館騷先跪呀？MC就話要保持神秘喇！
身為去年《叱咤》新力軍金獎得主嘅MC同Gigi，希望今年再下一城，對於有指MC大有機會染指男歌手獎項，佢坦言恨攞獎，就算得獎與否都度定致謝辭咁話！Gigi就向唱作人獎項邁進，但最希望孖生細妹張蔓莎可以拎新人獎。此外，6號仲預告會為《季前賽》唱情歌；Thor就緊張接棒新劇《繩角》嘅反應。
