【Viu】微辣喺農曆年初二、初三舉行新春舞台劇《一年之計搞乜春》，騷名咁有gimmick，到底會喺台上搞乜？阿丞就話會同Yelo表演魔術，而一向玩開魔術嘅加蔥，今次就有新突破，要著女僕裝跳KPOP舞添！真係聽到都覺得爆啊！加蔥講笑話唔介意大家將呢part當成廁所位，少一個人睇就少丟一次架咁話喎！另外為咗今次個騷，阿丞仲特登減肥，依家已經減咗5KG，成績相當唔錯，不過Yelo就即刻踢爆阿丞偷食，話之前同佢做完gym，佢即刻走去食乾炒牛河，阿丞就解釋就只係偶爾放鬆一下先會食啫！
而講到老闆六毫子喺佢哋努力綵排嘅時候，居然返咗去澳門，大家都覺得係一個騙局！不過話老闆唔在場都係好事，綵排先可以順順利利，事關六毫子就好似脫韁野馬咁唔受控制啊！咁大膽喺訪問度話老闆，佢哋真係唔驚俾六毫子秋後算帳㗎喎！
