【Viu】 陳奕迅《Fear and Dreams演唱會》噚晚嚟到第14晚，繼平安夜同聖誕節，Eason都因為節日賣大包為Fans一再安歌。噚晚Boxing Day，Eason以自己鼓勵大家，「好似跳舞咁，你哋都得㗎，我排舞時同dancers 跳 ，佢哋叫我做啲動作，我覺得自己好核突，哈哈，所以我排舞唔望鏡㗎，從來唔知自己跳成點，隻腳又粗額頭又闊，哈哈哈...但係既然我都做得。」佢鼓勵大家做任何事最緊要係有態度，「記住！ 唔好唔型、唔好俾韓國人型晒先得㗎！你睇我唱《浮誇》時，佢哋個d 樣...」Eason即席扮演一個呆樣，全場觀眾即拍掌歡呼讚同，並起鬨叫佢唱浮誇，佢一開始都話自己老啦，又冇準備唱《浮誇》，但最後都被Fans嘅熱情打動，「既然你哋咁想聽，唉，Christmas Special 唱幾句啦。」並喺樂隊用琴伴奏下唱咗一小段《浮誇》，呢份boxing day大禮，令觀眾開心到飛起！
