【2022年12月26日】「華人第一天團」五月天《諾亞方舟10週年進化復刻限定版演唱會》喺12月23號正式啟航，於樂天桃園棒球場由聖誕唱到2023年！而今次演唱會主舞台搭建直徑60米嘅彩虹「末日拱橋」，以及左右兩側超過22米嘅「LED土星環」螢幕，比起十年前有超大升級進化！當佢哋最後演唱《倔強》時，2.5萬歌迷舉起彩虹紙卡，築起超級彩虹，令五月天都超感動啊！
而嚟到第二晚平安夜場，按照慣例為歌迷送上重量級聖誕禮物，邀請「華語樂壇唱作歌后」G.E.M.鄧紫棋一起登船，第三次擔任五月天演唱會嘉賓，透過雲端登船，由全息投影技術令G.E.M.「真實」地站在台上同五月天合唱《為你寫下這首情歌》、《天空沒有極限》，為諾亞方舟注入一股柔情。
噚晚25號聖誕夜，阿信喺演唱會上回想起2016年聖誕節演唱會上擔任嘉賓嘅林志玲，當時佢仲為每位團員送上愛的抱抱！今年志玲姐姐都驚喜現「身」，化身最美聖誕女神問台下歌迷：「今年的聖誕節你想要和誰一起過呢？」轉個頭「姐夫」AKIRA型爆登場，代替志玲姐姐送俾五月天每個人愛的抱抱！ AKIRA仲帶埋EXILE THE SECOND團員一齊帶嚟一首《LAST CHRISTMAS》，令台下歌迷嗨爆，搞到阿信都呷醋話：「我們好像跑錯場，好像放浪兄弟演唱會。」
