【Viu】一連三場《Let It Snow C AllStar Live 2022》噚晚舉行尾場，「皇上」阿King趁聖誕節「報佳音」，喺台上宣布已經做咗老竇，仲大方分享囝囝「太子」嘅得意短片，Cute到爆呀！C AllStar隨即唱出歷代兒歌串燒，當係送畀「太子」嘅禮物，仲抛禮物落台，捧場嘅JayFung成功搶到呀，超High！C All Fans亦禮尚往來，為偶像送上驚喜，突然全場大合唱《天梯》，令四子相當感動，釗峰仲拎電話拍低震撼場面！
受訪時，King話同圈外太太喺疫情期間認識，已經註冊結婚，但未擺酒，囝囝都6個月大喇，中文名叫「雅洛」，英文名叫Analog，但On仔踢爆King原本打算叫囝囝做「太子」，笑Cry呀！On仔、釗峰同Jase澄清冇收埋戀情，緣份到自然會講，Jase仲笑言C AllStar唔止識生仔，仲識「生歌」，成員會陸續推出Solo歌，自己都會喺2月舉行首次個人演唱會；On仔亦自爆為咗《全民造星V》做導師而發惡夢，各有各忙啦！
