【Viu】Poki吳保錡試過推出兩首兵歌《猥瑣》同《羅曼蒂克衰亡史》後，今次搖身一變成為J-Rock樂隊主音，演繹Rock爆Band Sound《Am I Crazy?》，佢搵嚟ERROR兄弟Dee哥何啟華參與Rap部分，Dee哥為兄弟當然義不容辭啦，「音樂上我冇乜追求，今次當然係撐兄弟，難得Poki邀請我。」Dee哥除咗Rap以外，更瞓身幫手寫Rap詞，佢哋兩兄弟仲齊齊著上皮褲皮褸，以Rock友造型示人添！另外，強尼、Alice許寶恆同JFFT亦有客串MV，同保錡一齊演出爆笑劇情。
除咗忙住歌曲宣傳同拍劇外，保錡都積極同ERROR幾位兄弟為12月嘅《明星生活ERROR Live Show 2022》備戰，保錡對於銷售情況就唔擔心喇，反而驚撲唔到飛嘅Fans唔開心。佢同Dee哥透露今次Live Show將會係佢哋過去4年嘅概括總結，將以特別嘅形式同大家分享出道至今經歷嘅趣聞。兩位仲話如果《Am I Crazy?》MV反應好，絕不介意到時以MV中嘅Rock Star造型同錯粉見面！
