【Viu】宇宙天團ERROR首次合體拍劇，就有機會同宣萱、黑哥姜皓文、張慧儀、黎彼得咁多位大前輩合作新劇《極度俏郎君》，真係學到唔少嘢！佢哋仲話細細個已經睇宣萱拍劇，見到真人先知宣萱份人原來仲好nice，連《ERROR自爆96小時》都有睇，仲會跟住193一齊喊，ERROR聽到後都好滾動啊！保錡直情向宣萱當面表白讚佢靚女，不過阿Dee就即刻爆大鑊話保錡心裡最愛嘅係慧儀姐至真，搞到保錡即刻口窒窒！而193就好沾沾咁話今次拍劇佢有咀戲，而且係同女角色，終於唔使咀肥仔喇，我真係恭喜你啊！
而宣萱都爆料保錡其實係女都啱，成日口花花，連黑哥都唔放過！不過第一次同呢班後生仔合作，佢哋都覺得好新鮮有趣，雖然成日接佢哋啲爆肚，不過都拍得好開心，連捱通宵都唔覺得攰啊！而Yoyo今次就飾演靚女KOL同Dee有唔少對手戲，問我佢今次會唔會都有咀嘴戲，佢就大賣關子喇！一段時間冇見嘅黎彼得，年初做完手術終於康復復工，佢都好多謝生病期間對佢伸出援手嘅大劉同Bosco啊！
