【Viu】即將開騷嘅張繼聰今日出席腕錶活動，講番上星期籃球賽DJ隊以一分之差輸俾歌星隊，事後阿聰喺IG post相證193觸手犯規，笑指有機會會復仇，又自爆當日被「炒芥蘭」搵唔到兇手，加上賽前練波扭傷右腳，搞到嗰晚要趷出場館！同時佢都有關心姜濤腳傷，希望對方早日康復。
阿聰又搞笑話對於自己今年有份競逐「我最喜愛的男歌手」感到出奇，再倒自己米：「支持返啲有建樹嘅歌手，唔好錯愛我！」咁有冇投女歌手嗰票畀老婆謝安琪先？阿聰竟然話冇，今晚使唔使跪玻璃㗎？
另外，同場朱鑑然早前參加完維港泳大叫興奮，問到下次會唔會挑戰環島游？佢耍手擰頭嗌有恐懼，並透露嚟緊接拍咗一套運動主題嘅電視劇，唔知關唔關冰上曲棍球事呢？
