【Viu】 《2022年度叱咤樂壇流行榜頒獎典禮》記招噚日舉行，早排去完米蘭Fashion week嘅林家謙就孖住老死Serrini出席記招，唔知係咪出完埠心情勁靚，提到被視為男金大熱，家謙即刻講爛gag話自己：「我係『大熱』天時着冷衫！」似乎冇被緋聞影響噃！而Serrini亦化身經理人代家謙回應緋聞：「喺結婚之前都係單身！」仲話要保護返佢同Tyson Yoshi添，認真唔話得！
同場另一對「孖寶」鄭欣宜同Alfred許廷鏗，各自對個人獎項抱平常心，其中欣宜講笑話未得閒諗獎項住，依家成個腦都係同Anson Lo合體騷嘅舞步，事關教主學得實在太快又powerful，搞到佢擔心自己會跳錯，Alfred聽完即刻呷醋：「同新歡做完騷就返嚟顧及前夫！」講到好友林欣彤前日自爆甩拖，Alfred都話有慰問對方，同對方傾電話，佢仲大讚對方叻女、有勇氣。
另外，MC張天賦同陳蕾不約而同話想攞男、女歌手獎同可以演繹歌曲嘅「十大」，陳蕾自爆其實每年都有寫定得獎感受，寧願失望都唔想上台冇準備！
