【Viu】久未露面嘅Scarlett黃心美噚晚為活動擔任司儀，佢透露明年初去日本學滑雪，笑問有冇心儀男伴同行？佢話依家冇拍拖。好友陳安立年尾結婚搶花球加持吓？Scarlett即刻耍手擰頭，問到係咪搶到怕被追問戀情？佢話：「每次出嚟都被問阿妹啲問題壓力大過做event！」
既然提起妹妹黃心穎，最近佢公開同泥鯭拍拖，Scarlett聽到明顯落閘：「佢有拖拍係佢嘅事。」但漏口風指暫未有喺家庭聚會上見過泥鯭，問到之後會唔會同心穎姊妹檔開工？佢話心穎圓滿解約係第一步，但之後嘅路點行要靠佢自己。
同場仲有張松枝，講到佢最近post咗張同Kelly陳慧琳23年前嘅MV合照，二人食咗防腐劑咁引起熱論，佢隔空呼籲Kelly之後出新歌拍MV記得搵佢再合作。另外，型男幸卓輝喺Viu Original原創劇《Diane Be True呈獻：#她和她的戀愛小動作》入面飾演Kayan9896前男友，佢話嚟緊仲有作品係做渣男，仲笑話唔介意做「御用渣男」添！
