【Viu】由於疫情關係停辦兩年嘅《CASH金帆音樂獎》終於復辦，今日喺尖沙咀舉行記招，邀得前輩音樂人鄭國江同林志美宣佈入圍名單，有份入圍嘅林奕匡、吳林峰同湯令山（Gareth T.）等亦有到場支持。
適逢今年係CASH第20周年，大會特別嘉許今年合共有15個提名嘅黃偉文，又仲即場補頒「2021 CASH最廣泛演出金帆獎」，其中姜濤嘅《蒙着嘴說愛你》同呂爵安嘅《E先生連環不幸事件》亦有得獎。林奕匡為姜濤作曲嘅《Dear My Friend,》都有份入圍，佢自爆今年自己未出歌：「不過幫其他歌手寫嘅歌有攞獎都好開心。」
Gareth T.首次入圍CASH，佢話得唔得獎都冇所謂，而家緊張下個月嘅演唱會多過攞獎，仲温馨提示入場觀眾千祈唔好遲到。佢同吳林峰、許廷鏗同日開騷，Gareth T.就唔擔心影響入場：「聽佢哋同聽我嘅觀眾應該好唔同。」吳林峰同謝芊彤嘅合唱歌有份入圍好驚喜，吳林峰話下月同許廷鏗嘅音樂會搵咗岑寧兒同嘉賓，仲話要努力減肥。
