【Viu】兩場《TONE Music Festival 未來音樂祭 2022》完滿結束，台上嘅各單位以馬拉松式演出勢要炸爆亞博，而台下嘅觀眾亦high爆跳足全場，氣氛高漲！
尾場表演單位其中有麗英霸氣唱出《FreeRider》，仲即場轉channel大唱《東京一轉》嘅日文版《東京夢遊》；「豹哥」陳蕾用魅力、歌聲完美hold住全場，帶嚟《娑婆》、《旁觀有罪》等，雖然演出前有個小插曲，因技術問題而擾攘咗成10幾分鐘，之後大會仲停晒前奏同燈光，但無減fans嘅熱情，最後當然順利進行；Janice衛蘭就喺尾段現身，孖樂隊逆流合唱《落花 X 穿花蝴蝶》，挑戰重型音樂曲風充滿新鮮感！
