【Viu】Louise王丹妮今日出席護膚品牌活動，受訪嗰陣搞笑篤爆囡囡貪靚過自己，除咗會偷用護膚品、化妝品之外，仲會偷着高踭鞋。講到近日孖老公羅孝勇為偶像黎明拍攝新歌《一生幸福》MV，Louise即高呼「我愛黎明」，覺得既開心又榮幸，感謝林日曦為佢兩公婆留下呢個咁美好嘅回憶。
MV入面Louise同老公有唔少爭執戲份，佢利申只係放大效果，戲外係以禮相待嘅，所以大家請放心～提到二人身穿婚紗、禮服，係咪為補擺酒預演？Louise話希望疫情後可以搞個小型party，又笑謂到時可以喺party上播呢個MV。至於日前為口罩小姐擔任評審，Louise話係光明正大望女仔，而佢首次做評審都有向前輩谷德昭偷師，最後三甲賽果同自己心目中都相近嘅！
