【Viu】《第40屆香港電影金像獎》將於星期日晚隆重舉行，主席爾冬陞話今年由文化中心移師九展舉行，可以免受天氣影響；而防疫安排亦跟足政府規定。董事錢嘉樂亦話室內紅地氈安排會令大家耳目一新。不過，爾導話今日冇特定司儀同opening嘅大型歌舞表演，而MIRROR做表演嘉賓就係多個月前已經邀請。錢嘉樂就話亮相ViuTV唔怕娘家嬲，仲話係TVB叫佢嚟㗎！問到林家棟嘅傷勢如何？爾導話傷勢冇傳媒報道咁嚴重，但未知家棟會否出席，要等對方通知。
此外，有份角逐「最佳新演員」同影帝后嘅Louise王丹妮同「阿炳」梁仲恆，對得獎平常心，但阿炳笑言十幾歲已經度定得獎感言。Louise就話最緊要戰衣夠靚夠索；阿炳亦話包保靚仔到大家認唔出。
