【Viu】女團Lolly Talk噚日現身主題樂園吸引大批fans圍觀，而佢哋呢次嘅任務就係要宣傳樂園新人物LinaBell啦！8個女仔勁hyper咁話期待咗呢日好耐，仲搞笑話一入園即刻有減齡嘅感覺。講到最難忘嘅環節，自封做「為食女團」嘅佢哋首選係食雪糕，然後就話係畫畫，問到邊位成員畫得最靚？「畫家」阿蛋獲得大部分嘅票數，至於Elka嘅畫作就被阿妹評為：「好有味道！好有個人風格！」簡直係笑爆嘴！
提到佢哋日前為上月生日嘅MeiMei補食生日飯慶祝，就連元祖成員Day都有玩身，壽星女感動話冇諗過生日過咗一段時間仲會收到驚喜，而生日願望就係希望Lolly Talk會更加多人認識！相信呢個願望一定會實現嘅！
