【Viu】側田噚晚喺會展舉行頭場音樂會，大唱經典歌嚟勾起fans嘅回憶！嚟睇騷嘅有小肥、方力申、DEZ余宗遙等，唔知側田係咪好耐都冇見香港嘅fans寧舍感觸，唱完第一首歌就話想喊，坦言幻想開呢個騷足足3年時間，等到有啲「生銹」，更講笑話「消失」呢幾年冇更新過任何social media就被誤以為死咗！睬！認真大吉利事！
側田指開騷前都冇乜點做訪問，就係想留番開騷嗰陣同大家解釋，原來呢3年佢去咗泰國住，重整自己思緒，去除腦內雜念，亦順利搵番失去咗嘅笑容。話晒咁耐冇見就梗係要派福利啦！除咗喺台上面換帽、除衫同跳舞之外，唱到興起之際，佢仲拎住自拍相機衝落台近距離親親fans，相信呢個機會之後陸續有嚟，因為側田承諾會再開騷，咁就唔好要fans等咁耐啦！
