【Viu】七仙羽（七師傅）同火火再度合作拍ViuTV節目《瘋火與膠七》，默契唔使講就梗係滿分啦！七師傅形容同火火嘅關係早已昇華至老夫老妻，火火甚至話今次係小別勝新婚添！講到咁sweet，怕唔怕各自嘅另一半呷醋㗎？火火勁hyper話仲好：「呷醋嘅話咪各自分手再一齊囉！」喺度想同「火嫂」講聲⋯ 呢句應該都係節目效果嚟啫！好彩七師傅堅決話唔會同外籍男友分手，但下句就話最多咪四人行⋯ 媽呀！大人嘅世界真係好複雜呀！
再爆都仲有呀！呢「兩公婆」話喺節目入面有上床，火火仲透露好親熱㗎，錫錫已經算小兒科，「我都有七情六慾、有非分之想！佢（七師傅）話濕吻都唔緊要㗎！最緊要脷要包保鮮紙！」激到咁⋯ 邊夠你玩呀？而有份主持嘅Sica high爆話終於成功爭取同七師傅合作拍節目，問到會唔會同師傅battle一下米線阿姐口音？佢謙稱唔敢向前輩挑機，反而會多多學習。
