【Viu】Jay Fung一連四晚嘅九展個唱，噚晚喺三號風球下正式開鑼！除咗Daddy Mami有嚟捧場之外，阿Jay嘅一班圈中好友包括林奕匡、蔡一傑、林德信、梁釗峰，以及同門師弟妹ANSONBEAN同Cloud都有現身支持！揹住結他出場嘅阿Jay，自彈自唱為演唱會揭開序幕，雖然呢晚並冇出現大家期待嘅騷肌環節，不過佢都以真空西裝上陣大騷佢苦練已久嘅舞技！而呢晚高潮位一定係MIRROR副隊長AK擔任嘉賓喇，兩位一齊合唱《開始倒數》令全場on fire啊！AK仲透露同阿Jay嘅合作陸續有嚟，不過最搞笑係阿Jay自己都唔係好記得，睇嚟呢排為咗演唱會真係搞到佢分身乏術啊！而噚晚演唱會最大嘅洋蔥位，就係阿Jay哽咽提到嫲嫲兩年前因為疫情過身，再冇機會睇到佢嘅演唱會，所以特登寫咗《給缺席的人唱首歌》，希望送俾天上嘅嫲嫲，真係好有孝心啊！
