【Viu】繼三年前嘅《蝸牛》後，終於又等到AK再次搵Ian為佢譜寫新歌《Blue Monkey》，雖然邀歌冇難度，但AK就畀Ian用激將法要佢飆高音！AK表示：「佢咁啱喺最尾寫咗句好高音嘅嘢，我問佢係咪認真㗎？佢就話：『你咪試下唱囉！』」
AK解釋今次歌名《Blue Monkey》嘅由來：「我平時會睇一啲New Age嘢，其中有提及Blue Monkey，代表一個人要玩得開心啲，呢個係喺世界裡面嘅其中一個任務，有啲人會成日唔記得點樣去玩，我之前做嘢都係咁，太認真，唔識玩住去做，結果個人冇咁開心，亦做得冇咁好，最後慢慢發現，有啲嘢可以放鬆啲，輕鬆啲玩住去做，效果會更加好，同Oscar溝通之後，就有呢個歌詞內容嘅決定。」
新歌推出之前，咁啱AK要去紐約參與電影節，所以就萌生喺當地拍MV嘅念頭，佢補充解釋今次MV Idea：「平時睇開外國MV都不外乎係Party、女伴，難得去到美國，當然好想拍到咁樣嘅MV，因為外國啲屋好大景又靚，想做嘅效果就似返外國氣氛多啲。」喺靚人靚景下，AK拍攝過程都份外輕鬆愉快，更大派福利，騷出八嚿腹肌，直擊生粉嘅心臟仔！至於喺當地拍MV遇著咩困難？即刻去片睇下AK點講啦！
