【Viu】許廷鏗（Alfred）自舊年成立個人工作室後，首推黑膠唱片《2021》，限量1231隻，更為咗杜絕黃牛炒賣，預購方法別開生面要fans喺想獲得編號嘅ig post留言兼賺最多like，果然係有啲計仔！出碟咁開心就梗係要同fans搞個優先場慶祝，成件事咁正難怪Alfred乘機報喜指大碟幾乎全數被預購！
另外，講到日前佢喺《CHILL CLUB 推介榜 年度推介21/22》演唱《修羅場》嘅時候被神秘男聲「騎劫」，Alfred坦言事後真係有啲失落，因為自己好重視呢個live，所以忍唔住出放負post，之但係因禍得福收到好多鼓勵、支持嘅說話：「我係賺咗多過唔開心，依家非常之ok！」
