【Viu】毛舜筠、Alfred許廷鏗、Dickson余德丞、Hillary劉沛蘅今日出席珠寶活動，Dickson表示今次係回復自由身後，第一個公開活動，仲自爆雙喜臨門，噚日正式獲商台錄用，成為《口水多過浪花》嘅正職主持，仲有份為全新主題曲填詞。佢又笑言可以用「商台男員工」身份，趁機搵出每年披露叱咤得獎名單嘅「商台女員工」，認真鬼馬！講到日前聯同兩位Youtuber拍試食片嗰陣，因為批評餐廳難食，而被疑似老闆話要告佢哋，Dickson話未收到律師信，但會繼續分享食評，因為口味係好個人嘅。
至於Hillary聽日生日，向男友洪卓立放風話想要珠寶，又指對方仲未表示點樣慶祝，希望有驚喜。講到網友集氣嘅《膠戰S3》，Hillary話仲未有眉目，但6膠之後會繼續合作，敬請期待。
此外，毛姐話《阿媽有咗第二個》預計8月喺香港上映，佢大讚姜濤阿Jer演技。
