【Viu】樂隊Kolor今日喺淺水灣出席結合市集、音樂、chill元素嘅「KOLOR FEST HONG KONG 2022」，跟樂迷零距離舉行音樂會。主音Sammy話呢個音樂節係由結他手Robin構思出嚟：「今次完全係為咗自己，出面啲檔主冇畀錢我哋嘅。希望可以聚多啲人一齊玩，多啲樂隊一齊玩。」台上唱咗三、四首歌，觀眾已經開始叫Kolor除衫，Sammy即刻笑住話：「今日件衫我好鍾意，着多一陣先。如果除一件你哋就叫人除晒，唔好咁啦。」
騷後Kolor接受訪問，佢哋話本身個festival係喺一月舉行，但因為疫情所以延遲到而家，Robin話：「個場地真係好好，幫我哋hold個場hold到而家，希望之後都可以再搞，再搵多啲樂隊一齊玩。」Sammy喺騷上透露因為屋企正經歷緊啲事，覺得健康真係好重要，所以呼籲大家要多做運動，事後佢話：「屋企有長輩年紀大，所以身體變差，我哋都學習緊點去面對。」講到嚟緊嘅計劃，Kolor話希望今年內會開演唱會，而家搵緊場地：「本身年頭係紅館，但都因為疫情所以冇咗，紅館就要再入過紙，未知得唔得，但係今年點都會搞，所以都睇緊其他場地。」
