【Viu】Happy Ian day！今日就係陳卓賢嘅29歲生日，獲一班MIRROR兄弟輪流送祝福，仲有近千名Hellosss齊集九展生日展覽同偶像賀壽，人數足足逼爆4層樓！喺呢個咁重要嘅日子，fans club專登安排咗同全球嘅Hellosss進行連線，喺晏晝5點同海外fans連線一齊切蛋糕，不得了，原來切蛋糕係有壽星出現架！陳仔到切蛋糕儀式時，佢對住兩個靚靚蛋糕許願，然後話好感謝fans安排同祝賀，抬一抬高頭望向四周見到密麻麻嘅Hellosss，佢就行去蛋糕前背台同現場Hellosss嚟張大合照，搞到大家v嘩鬼叫咁興奮！
更有Hellosss自發製作生日紀念品送fans，令現場人龍處處，就好似去咗嘉年華咁墟冚！其中Cherry、菠蘿聯同其他Hellosss準備咗800頂生日帽，大讚偶像係十項全能；Joyce同Yuki特登請假，今朝就8點到場攞籌，成功入手限量609隻小小卓賢，佢哋話做埋慈善真係好意義，買到心頭好之餘，仲可以幫助其他人，同時又可以join埋其他地方嘅Hellosss同壽星仔慶祝生日，寧舍開心！而除咗九展展覽之外，Hellosss仲有喺上環畫咗幅生日壁畫，另外當然唔少得巴士嘅生日燈箱牌，Ian真係冇處不在呀！
