【Viu】姜濤今日出席HPV活動，席間播出宣傳片，佢仲自爆原來導演係「維園阿叔」，曾經交過手，笑言以後打波會禮讓啲。姜Man話生日當晚係臨時起意去銅鑼灣多謝Fans，以為夜晚少人啲，點知只係自己近視眼睇唔清遠處仲有好多人，事後都有檢討危險性。講到姜媽都有落去打卡，姜Man話媽咪事前冇通知佢，自己都有勸姜媽唔好去人多地方，但笑言知道Fans叫媽咪做「奶奶」，又爆媽咪因為自己入行而多咗朋友，仲叫佢買演唱會飛添呀！問到媽咪有冇催佢帶「真新抱」見家長，佢就話媽咪唔鼓勵佢拍拖，雖然自己一定唔會keep住A0，但就算有拖拍都唔會公佈喎！
講到演唱會飛炒到44萬，姜濤認為唔會有人買，寧願開多幾場滿足Fans好過益黃牛，最近大家都開始操Fit，但騷肌就交畀Jeremy！姜濤都大方回應陶傑嘅「虛火論」，承諾MIRROR會繼續努力，將虛火變實火！此外，姜濤大讚軒公扮MIRROR維肖維妙，相當佩服！
