【Viu】由《毒舌大狀》導演吳煒倫執導賀歲片《夜王》，以夜總會為舞台，美女如雲，當中黃子華同Sammi鄭秀文喺戲中飾演既係前度又係冤家嘅拍檔，火花四射，其中一場由賭場鬥到情場、酒店「聚舊」嘅重頭戲，連導演都拍到大叫過癮。導演笑言子華同Sammi都非常專業，全程無設限，「拍得放」對佢哋嚟講只係基本功，目標係拍到賞心悅目。講到子華床戲有冇特別操肌，導演打趣話：「何止當天？佢好似日日都有操㗎喎。」
而子華拍完就笑住投訴：「你知唔知我為咗呢場戲忍咗幾耐口？你擺到最後先拍。」同Sammi 繼《失戀急讓》後再合作，子華形容簡直願望成真，默契自然流露，又似冤家又似情人，拍得順暢又有趣。除咗Sammi，今次仲集合《毒舌大狀》班底加多位新面孔，子華直言女孩子數量多到「花多眼亂」，而且個個投入做舞小姐：「如果要我評分，我會俾一萬分！」
賀歲片當然少不了笑料，重任就交到阿卵楊偉倫身上，子華更點名大讚，話佢有機會成為香港新一代笑匠，保證每場有佢出現都笑聲不斷。不過，歡樂背後都有代價。子華坦言拍《夜王》好恐怖：「我講咗三世人份量嘅粗口，吸咗十世人份量嘅煙，真係為電影犧牲咗對肺！」但為咗呈現真實夜總會世界，只好頂硬上！
