【Viu】一連兩場《Jer Lau “The Shape of Breathing” Live 2025》今晚喺亞博開鑼，鑑於日前大埔宏福苑發生火災慘劇，Jer同團隊喺正式開騷前齊齊出場，首先感謝各位觀眾喺呢個社會氣氛下依然入場，仲話：「我係一個好相信音樂嘅人，音樂喺呢啲咁難過嘅時段，可以畀到力量自己，或者身邊嘅朋友，我哋喺今次嘅演唱會，希望用呢個騷嘅力量，畀到大家向前行嘅動力！」隨即呼籲全場觀眾一齊起立，為大埔火災死難者默哀一分鐘，專誠捧場嘅Jeremy@MIRROR、Marf@COLLAR同男友Locker、《造星V》羅子熙亦站立低頭默哀。Jer其後以衛蘭嘅《呼吸之間》寄語大家手牽手跨過是次難關，共同努力！
其後拖住小男孩嘅Jer，喺一大班小朋友陪伴下獻唱《Dear Children》，發放正能量，仲話當初寫呢首歌正正係受學童輕生事件啟發。Jer之後升上高台同全場大合唱《人類群星閃耀時》，「柳柳粉」亦聽從偶像指示，喺呢首歌先開燈牌應援，加上滿天「星星」紙碎，場面感動！
此外，Jer嘅FC亦喺開場前大合照時取消嗌口號環節，以及宣佈FC同應援打卡區參與者合共捐出15萬畀樂善堂關懷基金（緊急支援大埔火警事故），祝願救援工作順利同埋大家平安。而場外鏡粉亦準備咗心意卡專區為消防員同救護員打氣，相當有心！
