【A&M Diary】香港市區地少人多，加上唔少建築物嘅樓齡超過50年，除咗翻新，重建係另一個選擇。以前太細個，無呢啲概念，唔識用眼睛同相機記住清拆前嘅畫面，好似九龍寨城、啟德機場、利東街等，依家只可以透過當年嘅新聞報導，去回憶一啲薄弱嘅回憶。喺2020年11月嘅施政報告入面，政府公佈平民屋宇有限公司將會同市區重建局合作，重建大坑西邨，就趁重建前，用眼睛記低將會喺地圖上消失嘅地方。
提提你
1. 作為旅客嘅我哋記住要保持寧靜，唔好影響當地人嘅生活呀！
大坑西邨
香港約有三分之一市民住喺公共屋邨，而首個公共屋邨就係1952年落成嘅上李屋邨。近年落成嘅公共屋邨，雖然生活環境同配套都大大提升，但住客多數為新移民，引發唔少社會問題，亦缺少咗公屋嘅人情味。
至於大坑西邨係因應1953年石硤尾寮屋區發生大火，當時政府以特惠地價批出土地予香港平民屋宇有限公司，喺1961年將被燒毁嘅「光民村」改建而成，提供1600個單位，廉價出租俾低收入人士。以「興強順利，康樂安泰」為各座樓宇命名，即1965年入伙嘅民興樓、民強樓、民順樓、民利樓、民康樓、民樂樓、民安樓同1981年入伙嘅民泰樓。大坑西邨嘅樓齡已經超過55年，由於屋邨老化，所以將會開始重建，趁推土機動工前，不如用眼同心去感受舊公屋情懷。
希望我哋嘅相片能夠為歷史出一分力！
