【A&M Diary】唔知你哋對香港嘅漫畫有幾多認識呢？有時聽A媽同A爸講，佢哋細個嘅娛樂就係睇《13點》、《古惑仔》呢啲港產漫畫，而身為80後嘅我哋，講起港產漫畫就一定諗起《老夫子》同《麥兜》啦！雖然香港嘅漫畫無日本漫畫咁多元化，但反而好貼近我哋嘅生活，有時會睇到會心微笑。近年，雖然大家嘅娛樂選擇多咗，但香港仍然有唔少漫畫創作，好似《癲噹》同《聾貓》等等，今日我哋就去到位於九龍公園嘅香港漫畫星光大道，向一眾香港漫畫家致敬！
香港漫畫星光大道
香港漫畫星光大道係世界上首條以漫畫為主題嘅星光大道。大道上設有10個香港漫畫家銅製手印同24個香港漫畫角色嘅彩繪雕塑。
香港漫畫家銅製手印
喺整條星光大道設有10個香港漫畫家銅製手印，其中最為大家熟悉嘅就有《龍虎門》嘅黃玉郎同《老夫子》嘅王澤等等。
彩繪雕塑
而整條星光大道亦設有24個彩繪雕塑，而之前投票票數最高嘅6位漫畫角色，包括：牛仔、王小虎、老夫子、步驚雲、13點和華英雄，佢哋嘅雕塑高2.7米，而其餘嘅彩繪雕塑則高1.8米。
嚟到當然要同每一個漫畫角色影番張相啦，而如果對佢哋唔係太熟識，都可以睇吓每個雕塑旁嘅簡介。要數呢到最威嘅漫畫角色，當然就係麥兜啦，佢除咗喺香港漫畫星光大道設有彩繪雕塑，喺香港星光大道亦設有銅像。
