【A&M Diary】香港有唔少觀景台，可以從唔同角度欣賞香港嘅景色，其中大部份觀景台都喺行山徑或家樂徑內，但當中都有唔少觀景台係揸車可以直達，啱晒我哋呢啲懶人，今日我哋就揸住1064去到龍翔道觀景台，欣賞九龍半島嘅景色。
龍翔道觀景台
當年機場仲喺啟德嘅時候，龍翔道觀景台係一個觀賞飛機升降熱點，仲可以睇到飛機喺鬧市穿梭嘅驚險場面。
喺龍翔道觀景台有3個涼亭，設計好有70年代感覺，雖然依家舊機場已經搬走，但都吸引唔少人嚟呢到欣賞九龍半島嘅景色，如果天氣好，仲可以清楚睇到太平山嘅凌霄閣添。至於最近我哋嘅建築物，就係又一城同九龍塘豪宅區，之後就係旺角朗豪坊同香港最高嘅環球貿易廣場（ICC）。不過，觀景台被唔少樹木遮擋，所以想影靚相可以去到旁邊嘅斜路位置。
