【A&M Diary】平時睇中華白海豚，好多人都會諗起大澳，但其實中華白海豚嘅屋企，係位於沙洲同龍鼓洲一帶海域。不過，隨住機場填海、港珠澳大橋等工程嘅污染，好多環境學家都話中華白海豚已甚少喺香港海域出沒，但今日有機會同A姐嚟到呢個杳無人煙嘅離島：沙洲，就同大家分享一下啦！
前往沙洲之方法
沙洲係無任何公眾渡輪服務，如前往可以選擇參加本地旅行團或由荃灣碼頭包船前往。
提提你
1. 沙洲係無人島，亦無任何士多補給站，如果大家前往沙洲，必須自備所需用品。
2. 沙洲係具有特殊科學價值地點，並屬於合稱沙洲及龍鼓洲海岸公園一部份，參觀遊覽時絕對唔可以破壞環境。
沙洲及龍鼓洲海岸公園
海岸公園範圍包括龍鼓洲、沙洲（包括上沙洲、小沙洲、下沙洲）同白洲。面積1200公頃，係香港第三個，而面積最大嘅海岸公園。
貓石
一上船，就有大大隻貓歡迎大家，呢個貓石你又睇唔睇到呢？
西海明珠
由碼頭大概行10至15分鐘，就會去到沙洲最高點，56米海拔嘅西海明珠。呢粒明珠其實係機場管理局及天文台合作嘅天氣雷達站，用途係監察機場一帶天氣變化，以防止航機受風切變影響。另外，沙洲亦設有直升機坪作緊急服務。
