【Now新聞台】截至早上11點，1小時內《彭博》用戶關注度上升最多的港股，依次為快手、蒙牛乳業、中國飛鶴、龍湖集團、中芯國際。
快手股價連續第6日創上市新低，今朝低開6%後，一度低見78.6元，半日市跌逾7%，報82.75元。
股份成交量連續兩日顯著增加，單係半日成交量已超過5300萬股，比上日全日高出1000萬股，成交金額逾44億元，僅次騰訊控股同逆市急升嘅中芯。
值得留意係，快手一批涉及38億股嘅股份，相當於已發行股本94.8%，噚日剛剛「解禁」。
大華繼顯執行董事梁偉源指，解禁股之中，僅1.65億股由基石投資者揸住，其餘都喺大股東手上，呢兩日或有基石投資者趁機沽少少，但市場已經消化咗來自佢哋嘅沽壓，投資者唔使太擔心。不過，快手業績短期都好難「止血」，加上內地科網平台監管風暴未散，梁偉源相信，快手沽壓仍然好大。
