【A&M Diary】琴晚臨訓前，A姐話想聽朝去飲茶食點心。結果，早茶時段，佢未起身；等到下午茶時段，佢都未起身！終於，喺下午3點半佢起身喇，我嘅早餐終於有著落喇！好彩依家食點心唔止得酒樓，仲有好多點心專門店，真係想凌晨食點心都無問題啦。呢間位於太子嘅籠太子點心專門店，雖然無米芝蓮嘅眷戀，但人氣十足，我哋今日就去嘆吓茶啦！
原隻鮑魚燒賣
細細隻嘅鮑魚仔，意想唔到鮑魚味咁濃，好煙韌好有咬口！而燒賣大大粒，豬肉同蝦嘅比例啱啱好，一人一隻唔會太多太溜。
籠太子蝦餃皇
除咗燒賣，蝦餃都可以叫2粒，不過我哋太鍾意食蝦餃，所以叫咗4粒。蝦餃皮薄，晶瑩剔透，蝦肉彈牙，好新鮮呀！
黑椒金錢肚
黑椒味道香濃，金錢肚夠晒入味。再用埋索晒汁嘅烏冬墊底，好好味呀！不過，份量就略嫌較少。
雪山叉燒包
包面嘅雪山夠晒香脆，麵包鬆軟，入面叉燒嘅份量十足，好好味呀！
原隻鮮蝦腸
腸粉好滑，每件都有大大隻嘅彈牙鮮蝦，好滿足呀！
