【A&M Diary】自從宋皇臺站開通咗之後，去九龍城食飯真係方便得多，所以今日我又同M佬嚟九龍城四出搵食。九龍城有好多唔同嘅菜式，但講到我哋最鍾意嘅嘢食，當然就係打邊爐啦！原來九龍城除咗泰國菜之外，都有唔少火鍋店，所以今日就搵咗一間質素都唔錯嘅大邊爐火鍋店。
***為慶祝餐廳開業18周年同宋皇臺站開幕，依家只要向店員出示某兩個youtuber嘅影片介紹，更可享有折扣優惠（2-4人全單可減200元；5-8人則全單可減400元）
冬瓜鮮雞湯
湯底有唔少選擇，今日就揀咗冬瓜鮮雞湯。湯底入面除咗有消暑嘅冬瓜之外，仲有好多雞件同豬湯骨，菜料夠晒豐富！更驚喜嘅發現，湯底原來仲有唔少花膠。整體嚟講，湯底略嫌偏淡，相信係打邊爐嘅時候，湯底會越打越鹹，所以餐廳刻意將湯底選擇淡口味。
手切安格斯肥牛
例牌嘅手切安格斯肥牛，2個人食份量啱啱好。肥牛雪花分佈平均，肉味香濃嫩滑，輕輕一淥就食得。
梅菜豬肉丸
豬肉丸好彈牙，咬開仲會爆晒汁，好juicy。但重點當然就係梅菜比例啱啱好，非常香口，完全唔需要點豉油架！
四色餃
四色餃分別係魚皮餃、鮮蝦水餃、莧菜帶子餃同沙葛爽爽餃。每款都有2位，粒粒都大大隻，餡料勁多。呢度嘅水餃每款都係餐廳人手自家製，真係夠晒新鮮，而且每一款都與別不同。特別推薦沙葛爽爽餃，入面有唔少沙葛，所以食嘅時候超爽口，每一啖都會索索聲；至於魚皮餃因為係自家製作，所以唔似現成嘅魚皮餃又肥又細粒，所以食得夠健康而且口感非常豐富。
