＜好遊＞粉紅色的季節全港8大賞櫻打卡熱點攻略

【A&M Diary】想欣賞櫻花唔一定要去日本嘅，其實香港都有唔少地方可以賞櫻。而過咗立春之後，香港嘅天氣逐漸回暖，由2月中下旬至4月都係香港櫻花季，花期約兩星期左右。本文為大家綜合全港8個熱門嘅賞櫻打卡熱點，一齊過一個粉紅色嘅季節啦！

提提你
1. 自己垃圾自己帶走，唔好破壞大自然環境
2. 為咗令更多人都可以賞櫻，所以大家眼看手勿動，千祈唔好採摘櫻花呀

櫻花花期
當天氣回暖，櫻花就會開花，所以香港嘅賞櫻花期，大概為每年2月中下旬至4月

1. 沙田安景街公園
地址：地圖
沙田城門河畔嘅櫻花嚟自日本南部嘅富士櫻，所以勉強適合喺香港種植。而沙田城門河安景街公園嘅櫻花樹大概有10棵，顏色偏粉紅，所以影相打卡好靚。

2. 將軍澳香港單車館公園
地址：地圖
香港單車館公園內種咗9棵台灣品種嘅緋寒櫻和2棵日本品種山櫻，櫻花樹緊密相連，盛開期會形成一片粉紅色花海。大家更可以租架單車，賞櫻同時踩單車，真係好有日本嘅感覺呀！

3. 大帽山扶輪公園
地址：地圖
上到嚟大帽山，除咗幫襯蓮姐嘅燒賣魚蛋之外，喺扶輪公園茶水亭對出就種咗38棵台灣品種嘅緋寒櫻。櫻花嘅數量又多又密，真係輕易就影到打卡靚相呀！

4. 長洲關公忠義亭
地址：地圖
長洲關公忠義亭嘅櫻花樹，係40幾年前由台灣移植到香港，被譽為香港第一批嘅櫻花樹，所以相信唔少人第一次喺香港賞櫻都係嚟到長洲關公忠義亭。關公忠義亭內種咗十幾棵台灣品種嘅山櫻樹，櫻花花形細小卻密集，真係好靚架！

5. 大埔嘉道理農場
地址：地圖
大埔嘉道理農場佔地148公頃，嘉道理農場以推廣保育為目標，係一個適合親子探索自然生態嘅好地方。至於園內一年四季都有唔同品種嘅花卉盛開，當然唔少得櫻花啦！大埔嘉道理農場嘅櫻花品種，主要為台灣嘅山櫻。整個園區種咗超過100棵櫻花，雖然數量非常多，但分佈喺嘉道理兄弟紀念亭至觀音山山頂一帶，適合大家邊郊遊行山邊影相。