【A&M Diary】想影畢業相？打卡？少女風？文青系？甚至係時空穿梭主題，都可以嚟到位於元朗嘅綠色隧道！呢條綠色隧道本身名為NS220，主要係連接大旗嶺路同朗河路嘅行人隧道，因為當年鄭秀文嘅《八公里》MV就喺呢度取景而開始為人認識，到近嚟因為大家多咗留喺香港本地遊，令呢條隧道再次聲名大噪，所以今日我就帶A姐嚟到綠色隧道打卡影靚相喇！
前往方法
1. 自駕遊：車可以泊喺朗河路或附近一帶嘅停車場
2. 於西鐵元朗站轉乘的士至元朗大旗嶺路，附近為偉記燒烤樂園
3. 於西鐵朗屏站轉乘K66接駁巴士，於蝶翠峰站落車，再步行10分鐘左右
提提你
1. 隧道本為讓居民穿梭，大家影相打卡時，記住唔好影響居民生活，保持適當嘅音量
2. 隧道附近極多蚊，記住噴定蚊怕水
3. 隧道不時有居民踩單車穿過隧道，影相時要留心車輛出
元朗綠色隧道
其實元朗有好多條特色嘅隧道，但呢條玩顏色嘅綠色隧道就深得大家喜愛。隧道以綠色半圓形坑紋鐵皮牆身，加上天花嘅光管，形造成深淺綠色嘅對比，有啲人甚至將呢條隧道媲美烏克蘭嘅「愛之隧道（ Tunnel of Love, Ukraine）」，不過我哋就覺得唔可以相提並論喇！
喺呢條綠色隧道內，因為色差同光線嘅對比，反而形成一個穿越時空嘅感覺。
