【A&M Diary】天氣開始凍，就梗係要由外暖到內，最啱就係食啲暖笠笠嘅嘢食喇！最暖笠笠嘅選擇，當然就係打邊爐啦！除咗唔同嘅養生湯底、雞煲同羊腩煲之外，其實烤魚火鍋都好正㗎！今日嚟到西環嘅4號烤吧，嘆吓呢個好豐富嘅魚豐盛套餐。
麻辣牛肚絲、大豆芽滷大腸
前菜揀咗麻辣牛肚絲同大豆芽滷大腸：麻辣牛肚絲辣度適中，非常醒胃；至於大豆芽滷大腸好有驚喜，大腸洗得非常乾淨，重點係勁入味呀！
毛血旺烤魚
烤魚揀咗毛血旺烤魚，因為怕辣，所於揀咗BB辣。唔知大家食魚怕唔怕多骨呢？店員推介清江魚，相對無乜細骨同碎骨。魚肉越煮越入味，索晒湯汁，完全係精華所在，重點係煮耐咗，但啲魚肉都仲好嫩滑。另外烤魚入面仲有我最鍾意嘅鴨血，少少辣，好香滑。
生料拼盤
拼盤包括四寶丸、豆卜、蟹柳、芝士腸、金菇、雲吞同生菜。至於肉類就揀咗美國肥牛，份量啱啱好，最鍾意就係彈牙嘅四寶丸！
