【A&M Diary】喺華語電影入面，香港、台灣、中國為三大主要出產地。但近年澳門電影漸漸抬頭，多咗好多作品，有唔少澳門電影相信你都有睇過，例如：《骨妹》、《熱唱吧！》、甚至首部由美國電影發行商打入全球市場嘅澳門電影《INA》等等。如果想認識澳門本土電影，喺大三巴附近嘅戀愛・電影館就係一個唔錯嘅地方，我哋A姐M佬亦好榮幸可以參與今次嘅展覽當中。
戀愛・電影館 – 澳門電影
我哋認為要了解一個地方嘅文化，電影係其中一個唔錯嘅渠道。早年嘅澳門電影以獨立電影或微電影為主，近年就多咗好多商業作品，令更多人關注澳門嘅電影出品。
戀愛・電影館
戀愛・電影館鄰近澳門大三巴，去完大三巴潮聖，可以順便去埋保留澳葡式建築風格嘅戀愛・電影館打卡。戀愛・電影館樓高三層，以推動澳門電影文化為使命。其中放映廳以放映藝術電影及獨立電影為主，價錢收費唔貴，吸引唔少喜愛呢類電影嘅觀眾。
戀愛・電影館 – 電影資料室
至於近期，喺電影資料室入面就節錄唔少影評人對澳門電影嘅睇法，而我哋好榮幸獲得主辦單位嘅邀請，讓我哋參與其中，並刊登咗我哋A姐M佬對澳門電影《熱唱吧！》嘅影評節錄，我哋期望澳門電影可以越嚟越受到大家嘅關注！
