【A&M Diary】Weekend放假我哋就鍾意出身汗，同陽光及大自然玩遊戲，所以我哋嚟到大埔嘅嘉道理農場暨植物園。園內分為唔同景區，亦有唔同動植物保育活動同展覽，絕對係一個適合親子探索自然生態嘅好地方。加上園內一年四季都有唔同品種嘅花卉盛開，打卡check-in，玩足一日都得㗎！
前往方法
自駕遊：嘉道理農場僅提供幾個泊車位，可以經官網預約即日起30天內嘅車位預約服務，名額有限，先到先得
巴士：乘搭九巴64K巴士，於嘉道理農場暨植物園站落車
提提你
1. 園內設有洗手間、小食亭及飲水機，供大家補給之用
2. 大家記住保持環境清潔，絕對唔可以破壞大自然環境
嘉道理農場暨植物園
整個園區佔地148公頃，由羅蘭士勳爵、賀理士爵士、胡禮先生及胡挺生先生於1951年創立「嘉道理農業輔助會」，亦即係嘉道理農場暨植物園嘅前身。嘉道理農場除咗推廣保育之外，亦提供全港唯一野生動物拯救服務，治療受傷嘅野生動物，康復後嘅動物會送歸原本嘅棲息地。
觀光巴士
園區分為山上同山下兩大區域，當然你可以徒步上落山，但亦可以乘坐園區觀光巴士，直接前往山上景點。不過，巴士班次不多，而且座位有限，記得預留時間前往巴士站等車喇！
廣場
入到嚟嘉道理農場暨植物園嘅第一站就會嚟到廣場，喺廣場除咗可以野餐之外，亦可以了解有關自然環保同永續生活嘅展版。除此之外，亦可以同創辦人賀理士爵士嘅雕像影番張相。而位於廣場嘅旁邊亦有一個素食亭，大家可以喺度買啲嘢食吓或作補給。
映日園動物展覽館
喺素食亭旁邊，就有呢個映日園動物展覽館，呢度絕大部份係收留自非法捕獵同非法販賣嘅動物。其實市場上出售嘅每一隻寵物，就算合法，但背後嘅故事都唔簡單，所以盡量唔好購買動物，想養寵物嘅不妨考慮收養，但記住要做一個有責任心嘅主人。
翟克誠野生動物護理中心
喺呢個護理中心內，居住咗香港常見嘅野生動物，包括赤麂同短吻果蝠等。因為赤麂被拯救時係孤兒，唔適合放歸野外，所以佢就定居喺呢個模仿野外環境嘅護理中心。
猛禽之家
香港係候鳥遷徙嘅一個中途站，但有唔少雀鳥嚟到香港之後，會被高樓大廈嘅鏡面引致迷失方向，部份更會誤撞大廈玻璃受傷；亦有一部分禽鳥被非法飼養作寵物，再遭遺棄。所以經護理後嘅猛禽喺放歸野外前會住喺猛禽之家，喺呢度練習飛行，直至確定有能力喺野外生活，就會放歸野外。而發現不適合放歸野外嘅雀鳥就留喺呢度永久居住。
鸚鵡護理中心
鸚鵡係最多人飼養嘅雀鳥，但亦係最多人遺棄或放生嘅雀鳥之一。喺鸚鵡護理中心主要接收遭遺棄同流浪嘅鸚鵡，呢庿即鸚鵡品種包括：藍黃金剛鸚鵡、非洲灰鸚鵡、橙翅鸚哥同小葵花鳳頭鸚鵡等。
農場博物館
博物館原本係豬舍，喺2006年嘅時候加設展覽回顧嘉道理農場暨植物園嘅歷史。喺博物館內除咗可以睇到農場嘅歷史，呢度仲有小賣店提供新鮮農場產品、環保產品、書籍和雜誌，更設有經淨化嘅溪水飲水機。
森林果園
嘉道理農場暨植物園除咗收留唔少動物之外，亦培育唔少植物。其中森林果園就採用農林耕作方法，可以減少運用化學肥料同避免害蟲侵襲。
植物與我溫室
其實植物喺我哋嘅生活不可或缺，除咗可以係我哋嘅食物、調味品之外，更加可以係裝飾品，令我哋嘅生活多姿多彩，加添色彩同香氣；更重要係透過植物嘅光合作用，吸收二氧化碳並補充氧氣。所以入到嚟呢個溫室，見到色彩繽紛嘅花卉，令我哋嘅心情同生活節奏都大大放緩。
白理桃蘭花保育園
離開山下嘅景點，之後我哋就嚟到山上嘅景區。蘭花保育園展示各種各樣嘅蘭花，包括本地物種同嚟自印度緬甸地區嘅蘭花。
蕨類植物小徑
喺呢條短短嘅小徑就可以觀賞到130多種蕨類植物。
蝴蝶園
香港有超過230種蝴蝶同2000幾種飛蛾，而喺嘉道理農場暨植物園就記錄咗171種蝴蝶同1300種飛蛾喇！嘉道理農場之所以吸引咁多蝴蝶主要係因為園內種植咗唔同嘅植物，為蝴蝶同幼蟲提供花蜜、葉子作為食物。
