【A&M Diary】香港有唔少主打台式火鍋嘅餐廳，選擇好多唔知點揀好？近期我哋就推介呢間位於尖沙咀樂道，任飲任食吃到飽嘅牛品台式火鍋。牛品台式火鍋由屢獲殊榮嘅台灣廚師李龍翔師傅主理，湯料每日由台灣新鮮直送，讓大家輕鬆品嚐至新鮮嘅台式原味道！另一賣點係牛品台式火鍋提供多種台式小食，滿足好耐無去台灣嘅各位呀！牛品台式火鍋以牛肉等級分為多種唔同嘅吃到飽任飲任食放題套餐，我哋今日就揀咗主打澳洲M9和牛肩胛肉嘅牛御品吃到飽套餐。呢個牛御品吃到飽套餐有超過60款台灣高質食材，絕對能夠滿足一眾大胃王！
湯底
牛品台式火鍋提供10款精選湯底：牛品一品鍋、牛品秘製麻辣鍋、沙茶海鮮鍋、黑蒜黃金鍋、剝皮辣椒雞鍋、花菇昆布鍋、蕃茄濃湯鍋同酸菜白肉鍋等。而我哋就揀咗元氣養生鍋同柴魚昆布鍋，呢兩款湯底都非常足料，特別令我哋驚喜嘅係柴魚昆布鍋，因為平時喺日式火鍋店食嘅昆布鍋都係偏淡，但牛品台式火鍋嘅柴魚昆布鍋真係好濃郁，打邊爐前細味湯底，真係好鮮甜好有層次。
M9和牛丸
如果order牛御品吃到飽套餐就會送每位兩粒，咁就代表呢個M9和牛丸夠晒矜貴！同樣地，佢係唔會令你失望。M9和牛丸超彈牙，一咬落去，係會爆汁架，所以夠晒juicy，好好味！
澳洲M9和牛肩胛肉
請放心！牛品台式火鍋嘅澳洲M9和牛肩胛肉雖然每碟得兩塊，但絕對無出現漏單，而且每一碟都保持同樣質素，油脂比例平均，肉味濃郁，非常好味！
牛舌片
打邊爐我哋最鍾意就係食牛舌，因為牛舌有口感，但又唔會過韌，係另一款我哋推介嘅encore之選。
西班牙栗飼豬梅肉
平時打邊爐，相信大家都會瘋狂encore牛肉，但呢度嘅豬肉都絕對唔可以錯過。西班牙栗飼豬梅肉嘅肉味超濃，油香十足，但一啲都唔油膩。
海鮮
套餐提供三款任食嘅海鮮，包括：青口、蝦同蜆。我哋強烈推介蜆呀，超鮮甜，而且蜆肉大大隻，肉身漲卜卜！另外，蝦都非常鮮甜彈牙。
水蓮菜
我係第一次食水蓮菜，原來係咁好味架！水蓮係台灣美濃地區嘅特產，外觀長長幼幼，好似麵條咁，色澤翠綠，口感清甜爽脆，味道帶有淡淡嘅蓮花香氣，絕對係我哋今日encore list入面老是常出現嘅食物呀！
自取食物區
除咗order嘅食物，喺自取區亦有多種台灣直送嘅食材，例如：甜不辣條、凍豆腐、花枝丸、芋頭貢丸同多款水餃等。其中大甲崧化芋頭就最值得推介！大甲崧化芋頭非常鬆化，入口軟綿，芋頭味香濃！
台式小食
以台灣菜為主打，又點少得台式小食呢？如果你鍾意食台灣嘢嘅話，呢度除咗鹽酥雞、台灣腸、炸地瓜丸之外，仲有我哋最鍾意嘅麻辣鴨血、牛品牛三寶等多款小食。每款小食嘅份量都唔會好多，可以試完再揀鍾意嘅慢慢encore。
飲品
餐廳除咗汽水之外，當然唔少得台式嘅罐裝同包裝飲品啦！但最開心係可以叫埋春陽茶事嘅檸檬蜜烏龍、冬瓜茶、烏梅汁同珍珠鮮奶茶，真係夠晒滿足。
