【A&M Diary】出咗消費券就梗係要食餐好嘅滿足一吓自己啦！今日就帶A姐嚟到灣仔嘅新南苑私房菜火鍋鷄煲，餐廳以學校為主題，除咗大禮堂，包廂更命名為實驗室、家政室同圖書館等，我終於可以成為被A姐暗戀嘅學長喇！至於食物方面，我哋就揀咗至尊餐，除咗活海鮮拼盤之外，其他好似和牛、安格斯牛小排、海鮮等打邊爐配料，連同雞煲都係任叫任食，真係非常滿足！食物選擇超多，唔知餐廳可唔可以考慮整埋個操場，等我哋食飽飽可以做吓運動呢！
鬼馬雞煲
坐低攞好醬料之後，店員就會送上雞煲，上枱嘅剎那已經聞到好香喇！但店員提醒為保持雞肉嫩滑，所以上枱時未完全熟晒，要靠我哋好好控制時間，將雞肉同香料拌勻，令每件雞件煮得更入味。最尾就要加埋油炸鬼，令雞煲進化成為鬼馬雞煲啦！至於味道方面，呢個雞煲唔係主打麻辣，反而係主打層次。雞肉非常嫩滑，索晒秘製醬汁，加上放咗唔同香料，令雞肉嘅味道更有層次。至於最鬼馬嘅油炸鬼真係又邪惡又好味，因為佢哋索晒成個雞煲嘅所有精華，真係好滋味架！
冰鎮鮑魚
喺等緊打邊爐嘅鍋底之際，店員就送上冰鎮鮑魚。呢個冷盤可以話嚟得非常合時，可以refresh一吓自己，再食打邊爐。鮑魚非常爽口鮮甜，肉質有質感，但又唔會太硬實。
蕃茄香菇湯
食海鮮絕對唔需要太濃烈嘅湯底，呢個蕃茄湯夠鮮甜，加上菇香，可以令海鮮嘅鮮甜味更突出。
活海鮮拼盤
最期待當然係海鮮啦！呢個拼盤有虎蝦、馬刀貝、台山蠔、帆立貝、大蜆同脆肉鯇，所有海鮮都夠晒新鮮！虎蝦大過一隻手掌，蝦頭勁多蝦膏，但最正都係蝦肉超厚身，勁彈牙；馬刀貝係我哋無限添加推介，貝身大大隻，無沙又超鮮甜；至於台山蠔嘅蠔身漲卜卜，咬落去係會爆汁架；淥熟咗嘅帆立貝仍然夠大粒，爽口彈牙；至於脆肉鯇無骨，鮮甜有咬口。
牛肉選擇
我哋揀嘅至尊餐有5款牛肉選擇，分別係美國SRF黑毛和牛肉眼、安格斯牛小排、美國RP肥牛心片、美國肥牛同本地手切牛頸脊。如果你係大胃王，就梗係每款都試齊再落order啦！但如果你想重點出擊，我哋就有以下推介：
