【A&M Diary】一年一度嘅紀念日，就梗係要搵間有情調、質素又高嘅餐廳，咁先可以突顯我對A姐嘅重視嘛！嚟到尖沙咀諾士佛台嘅Oasis Bar & Grill，餐廳以大自然為主題，有唔少打卡位，滿足視覺享受。至於食物方面，我哋就揀咗以蠔為主打嘅套餐，同最美的人分享今個夜晚。
Refreshing Passion
食飯之前就叫杯飲品chill吓先，因為今日揸車，所以我哋叫咗無酒精嘅mocktail。特別推介呢杯Refreshing Passion，加入咗無酒精嘅蒸餾酒、柚子蜜、熱情果漿、蘋果汁、柑橘、薄荷葉同梳打水，味道非常清新，味道甜甜酸酸又帶有少少回甘，夠晒解喝。
Lips of an Angel
另一杯嘅Mocktail就揀咗Lips of an Angel，以富士蘋果汁同白桃蓉做主調，加上玫瑰漿、柑橘同梳打水，而杯邊仲有玫瑰花瓣做點綴，味道鮮甜，呈粉紅色，非常適合想打卡嘅少女心。
Parma Ham & Fig Salad
前菜方面就揀咗Parma Ham & Fig Salad，鹹香十足嘅巴拿馬火腿肉味香濃，油香豐富；配有新鮮無花果、羅馬生菜同檸檬柚子汁，配埋一齊食，中和左肉嘅鹹味，好match。
Oyster Platter
套餐嘅生蠔拼盤有三隻，分別係愛爾蘭嘅Irish Rock、法國嘅St. Martin同Mont Blanc。Irish Rock嘅海水味相對淡身，但反而更突顯蠔嘅甘甜；St. Martin嘅味道層次豐富，入口除咗有海水鮮味，細味品嚐，就可以體會到甜味同礦物味道，餘韻悠長。至於Mont Blanc肉身柔滑、好肥美，鮮甜又creamy。
Lobster Bisque
湯料同湯分開上，咁樣可以保存湯料嘅口感。特別一讚係用茶壺裝住嘅湯，份量有成兩碗，真係好大方呀！龍蝦湯好creamy，味道超濃郁，而入口柔滑。
Oyster Bisque
同樣地湯料同湯分開上，而份量係超多呀！湯底用咗大量廣島蠔打成，湯底非常鮮甜，湯料仲有原隻廣島蠔，蠔身細隻但飽滿，真係好滿足。
Oasis Bouillabaisse
主菜方面就揀咗餐廳signature嘅Oasis Bouillabaisse，鍾意食海鮮嘅你一定唔可以錯過！海鮮有海鱸魚、大蜆、青口同帶子等，每樣海鮮都夠晒新鮮。特別鍾意帶子，煮到半生熟，口感一流；至於海鱸魚完全無骨，啖啖肉，夠嫩滑。當然所有精華都喺晒個湯底度，充滿着海鮮嘅鮮甜味。
Grilled Rib Eye Steak
另一份主菜就叫咗肉眼扒，肉眼烤到呈坑紋，望上去已經好吸引，肉質嫩滑、牛味濃郁，但扒就略嫌薄咗啲喇。至於配料有薯仔、蘆筍同翠玉瓜。
