【A&M Diary】前排每個weekend都同A姐郊遊行山，所以嚟緊嘅long weekend同公眾假期，就玩Staycation輕鬆吓啦！嚟到位於尖沙咀嘅帝樂文娜公館，酒店大玩超現實主義設計，由踏入大堂開始，已經有唔少打卡位，夠晒驚喜，絕對顛覆你嘅視覺體驗。另外，今次嘅Staycation package包晒三餐，仲要係香港一向少見嘅北歐菜，CP值夠晒高。
酒店大堂
酒店位於尖沙咀鬧市，大概步行5分鐘，就可以去到尖沙咀／尖東港鐵站或前往彌敦道搭乘往各區嘅巴士路線。喺酒店附近就係各個大型商場、諾士佛台、人氣日式超市同二十四小時超級市場等等，想行街買嘢同補給日用品都好方便！
酒店設於金巴利道嘅玻璃門只係側門，我哋建議由旁邊嘅正門進入酒店，感受另一番風味。大門行中國風，除咗左右兩邊嘅獅子門環，仲掛上142個門鈴，好有氣勢！再細心啲睇，門鈴後面係西式嘅雕花，加上櫻桃木嘅顏色，真係匠心獨韻。當推開中式大門，視覺就會立即轉變成達利（Salvador Dali）風格，形成強烈對比。
酒店大堂地板以馬賽克鋪出圓形羅盤、時鐘等圖案，行抽象同虛幻風格；而大堂嘅梳化玩味十足，非常浮誇，係超現實嘅歐洲特色設計。雖然話係歐洲風，但其實亦隱含五行元素，糅合咗東西方同後現代色彩，所以喺酒店大堂經已驚喜處處！
另外，值得一提嘅係呢張老夫子座椅，係由老夫子作者親自設計，全港只係得兩張咋！
另外，持有房卡亦可享有Sasa及Hutong Footbath指定分店之優惠。
客房區域
酒店設有159間客房，包括6間唔同主題嘅套房。我哋今次入住嘅係deluxe room，一入到嚟房間，牆壁上嘅畫框、歐洲仿古傢俬及仿製壁爐，真係好似去咗歐洲啲Airbnb，A姐表示勁有旅行嘅感覺！
A姐最鍾意就係房間內嘅古典茶几櫃，非常古典優雅！喺茶几就放有電熱水壺、免費嘅茶包、咖啡包、蒸餾水、雪櫃同另外收費嘅Mini Bar。
位處鬧市內嘅酒店，雖然就夠晒方便，但景觀就以旁邊嘅大廈為主。至於雙人床屬於King size，床褥軟硬度適中，而床單非常柔軟，枕頭總共有4個，加上遮光度十足，真心瞓得非常舒服。床嘅兩邊都有床頭櫃同插頭位，放吓眼鏡或電話都夠晒方便。
喺靠窗嘅位置，就係偏廳同工作位置，除咗有一張梳化之外，亦有一張長長嘅書枱，無論做嘢定擺嘢都有足夠位置。
另外，當我哋入到嚟房間，酒店亦送上歡迎嘅蛋糕、曲奇同甜品，份量非常多，夠晒驚喜！
