【香港Staycation】文青藝術深度遊　東南樓藝術酒店

【A&M Diary】香港各大酒店都有唔少主題嘅Staycation Package，如果你係文青又或者藝術愛好者，呢間位於油麻地嘅東南樓藝術酒店就啱晒你喇！東南樓係一間集共享空間同藝廊嘅精品酒店，將多元化嘅藝術元素融入酒店每個角落，中西融合，潮玩復古。就算你好似A姐咁毫無藝術細胞，其實呢度都有好多打卡位，充滿驚喜！加上酒店亦有唔同嘅工作坊，等你可以慢活咁度過假期。

酒店大堂
東南樓嘅大門口已經係一個打卡位，穿過呢對充滿中華特色嘅紅色大門，就好似坐時光機咁，返到七十年代。

酒店喺2019年初開幕，樓高25層，其中7至21樓為客房樓層，共設有52間客房。第一站就當然先去位於5樓嘅酒店大堂check-in啦！

值得一讚係酒店嘅職員，佢哋除咗提供貼心嘅服務，更驚喜嘅係佢哋會同你分享酒店隱藏住嘅故事，好似東南樓嘅標誌係雙魚，除咗代表創辦人以海鮮酒家起家，亦代表住雙魚和諧共處，反映創辦人重視人同人及人同藝術之間每一個「相遇」嘅故事，將「人人均有欣賞和創作藝術的權利」嘅理念貫穿始終。

另外，大堂嘅設計中西融合，lobby嘅兩張凳已經係一個熱門打卡位。

至於旁邊就放有林一峰上次入住嘅歌詞手稿，同荔園回憶錄，值得大家細味。

東南樓藝術酒店提供唔同嘅Staycation套票，而我哋今次入住體驗選擇係：Art Retreat Slowcation 兩日一夜藝術療癒之旅，除咗客房之外，仲包埋《藝遊東南》一日通行證、《五感茶藝或咖啡沖煮體驗》同預約去酒店藝廊參觀。

客房區域
我哋今次入住嘅係樂韻客房，雖然房間面積唔大，但勝在有一大個窗戶，可以鳥瞰油麻地同旺角鬧市，空間感十足！

另外，樂韻客房以音樂為主題，房間係無電視，但就有一部iPad，可以用藍牙將iPad連上特色無線喇叭，細味嚟自加拿大嘅Jef Cheah所設計嘅歌單同本地音樂人李國華嘅油麻地聲音藝術，從音樂感受不一樣嘅油麻地。而iPad內上載酒店嘅資料以減少紙張運用，當然亦可以用iPad嚟上網啦！

講到房入邊最重要當然係張床啦！呢度嘅雙人床係King Size，軟硬度適中，床單係用上英國皇室御用嘅Peter Reed，床單被鋪好柔軟好舒服。枕頭總共有4個，兩個較軟，兩個較硬，聽住音樂瞓覺好舒服呀！床上仲有2個如意結型狀嘅攬枕，代表祝福嘅意思。至於床嘅兩邊分別有一般插頭同USB插頭，叉電夠晒方便。

至於房間仲有一個小驚喜，就係電話喇！喺中式床頭櫃上放有西式懷舊撥輪電話，中西融合之餘，仲潮玩復古，絕對係撥個輪就可以打電話喇！

房間內有免費提供蒸餾水、茶包同咖啡包，細心到連拖盤其實都係一件藝術品。床頭櫃內仲有保險箱、拖鞋、拖板等，夠晒貼心！

浴室區域
浴室分為兩部份，其中洗手盤就喺客房區域，提供牙刷同梳等個人用品。女孩子們可能覺得呢個設計唔太方便，但我反而覺得唔錯，因為當A姐朝早沖緊涼時，我就可以喺呢個位置梳洗；當A姐喺呢個位置化妝嘅時候，我就可以沖涼去廁所，唔洗排隊。另外，值得一提嘅係，喺洗手盤下邊嘅木凳，完全無用到釘，全靠傳統榫卯技術，非常穩固。

至於馬桶同淋浴就位處廁所內，面積雖然唔大，但記住細心留意一吓啲磁磚，每一塊都唔同，但又唔會突兀，估唔到連廁所都咁細心設計。而沖涼液標榜用可分解嘅環保物料，味道都唔錯㗎！

餐飲服務
酒店鼓勵大家探索油麻地大街小巷，感受香港地道文化，所以酒店並無餐廳，但喺5樓就有飲品店— City Terrace。呢度提供茶、咖啡、⼿⼯曲奇同手工啤。喺室內區域嘅打卡位就係中島天花燈，上面嘅青花瓷圖案，其實係用指印技術修飾，更顯品味。除咗空內區域，仲可以去到戶外平台，同A姐一邊細味手工啤酒嘅本土味，一邊欣賞油麻地街頭嘅日與夜，呢種慢活輕鬆嘅度假，真係好寫意呢！

五感茶藝體驗
我哋Staycation Package所包嘅五感茶藝體驗就係喺City Terrace舉行，由茶藝師輕鬆咁介紹每款茶嘅特點、飲茶嘅器具、分享飲茶禮儀、唔同國家地方飲茶嘅習慣等。大家仲可以用五個感官去品茶，原來當茶杯轉換，味道已經會唔一樣。最後，茶藝師亦會俾我哋親手泡一壺茶，原來泡茶都可以了解一個人嘅性格架！例如你係心急定細心嘅人，優柔寡斷定立場堅定嘅人，都可以從泡茶嘅細節了解得到。

藝遊東南
酒店雖然無游泳池同健身室，但呢個package包咗藝遊東南一日通行證（非住客亦可購買藝遊東南一日通行證）。藝遊東南有唔同嘅工作坊同專題展覽，讓訪客以視覺、聽覺、嗅覺、味覺同觸覺去感受作品。由1樓嘅尋香工作室、2樓嘅Art Lab、3樓嘅自修空間、位於22樓不定期開放嘅藝廊同23樓嘅room68，都有唔同嘅互動藝術體驗活動，加上每一層都有唔同藝術家創作嘅壁畫同瓷磚牆，甚至連後樓梯都有唔少驚喜，夾夾埋埋超過100件嘅作品，真係打卡都打足大半日！