【A&M Diary】A姐話想住新酒店玩Staycation，作為廿四孝男朋友嘅我，當然會滿足佢嘅要求，今次一於帶佢住1936年開幕嘅酒店啦！A姐一聽到1936年就話「吓！你知唔知今年已經2021年喇！」其實呢間位於太子嘅Hotel 1936係由香港古物古蹟辦事處評級為三級歷史嘅唐樓，經改建活化而成嘅精品酒店，裏面當然有唔少懷舊打卡位。我哋就一於返去30年代嘅香港，懷舊玩轉Staycation啦！
酒店大堂
被評為三級歷史建築物嘅唐樓建於1936年，所以酒店命名為「Hotel 1936 」。其實酒店分為2部份：唐樓樓高3層，外牆以至內部都被完整保留同復修活化；而客房區其實係全新興建，位於唐樓後座位置，樓高20層，以中國傳統嘅博古架線條作為大廈外牆設計。
Hotel 1936係以懷舊為主題嘅精品酒店，內部裝潢保留住歷史嘅味道，好似木門、露台、格仔階磚等等，充滿懷舊氣息又不失時尚簡約。搭電梯去到位於3樓嘅酒店大堂，就好似坐時光機返到30年代嘅香港，呢度已經有唔少打卡位，即刻同A姐影相啦！另外，酒店位於彌敦道，巴士選擇非常多，交通非常方便，至於步行3分鐘就到太子站或10分鐘就到旺角東站喇！
客房區域
酒店樓高20層，設有50間客房，房型分為經典房同尊貴經典房，我哋今次入住嘅係尊貴經典房。
平時住酒店一係海景，一係就市景，但Hotel 1936嘅景觀就係代表香港精神嘅獅子山，絕對係一個先天嘅賣點。配合埋獅子山下嘅九龍市景，單單係呢個view已經係一個打卡位啦！房間面積唔算大，但都係三邊落床，床褥屬於適中偏硬，加上新酒店新床褥，所以瞓得舒服！
房間內提供免費茶包、雪櫃、保險箱、風筒、USB充電插頭、免費無線上網，麻雀雖小，五臟俱全。
