【A&M Diary】喺金鐘返工嘅你，唔知會唔會覺得食lunch係一大難題呢？金鐘嘅餐廳選擇話多唔多，話少唔少，但排隊絕對係一大挑戰！有時唔想等咁耐，買件三文治同杯咖啡，咁就一餐喇！但嚟到冬天，總想食碗熱辣辣嘅麵呢！如果你都有同感，我推介呢間位於金鐘同灣仔交界嘅車仔麵之家，價錢夠晒抵，所以一直都人氣高企。雖然繁忙時間都要排隊，但始終車仔麵夠晒快手。但要留意，店內只有幾個立食位置，人多嘅話不如買外賣返office食啦！
A姐之選：牛腩、甜酸齋、豬紅配小油麵（中辣）
呢度嘅麵底份量分為大、中、小，如果肚餓嘅當然可以叫大size，不過我哋覺得細size就約等於平時食開嘅份量。A姐首推夠晒脆嘅甜酸齋，酸酸甜甜之外，索埋辣嘅湯汁，味道真係好有層次呀！另外，豬紅亦相當唔錯，唔會散又夠滑！
M佬之選：雞翼、冬菇、炸墨魚腐皮卷配小米粉（中辣）
冬菇份量超多呀，而且好入味！炸墨魚腐皮卷炸到脆卜卜，入面仲有粒粒墨魚，係唔錯嘅選擇。雞翼就大大隻，係抵食之選！但記住記住一定要加辣汁，真係好香濃，好好味㗎！
