【A&M Diary】代表香港嘅餐廳，當然係茶餐廳；代表香港嘅小姐，當然係香港小姐啦！不過唔係每間茶餐廳同港姐都會得到香港人嘅愛戴，除咗呢間由1994年香港小姐冠軍譚小環開設嘅大渣哥茶記！大渣哥由九龍灣嚟到銅鑼灣喇，人氣仍然高企，雖然要排隊，但都係絕對值得。
茶記入面嘅設計，以至菜式嘅命名都玩味十足，明嘅就一定會明架喇！食得茶記，當然唔會期望高質服務，食完就幫幫手快啲走：「飲飽食醉好散水，門口有人排緊隊，霸住張枱一個鐘，罰你咀啖譚耀宗！」
食物衛生焗 – 鮮茄焗豬扒飯
呢個焗豬扒飯好抵食，炒飯底超多，豬扒大大塊，厚切得嚟又夠腍滑，仲有蕃茄同菠蘿，A姐一個實食唔晒。
