【A&M Diary】喺香港我食過最最最最好味嘅牛丼飯，一定係A姐煮嘅，除咗味道啱晒我口味，仲有佢加入嘅愛心。不過知你無得食A姐嘅愛心牛丼飯，不如食住良心牛丼飯頂住先啦！呢度就係銅鑼灣嘅牛天神。
入到嚟牛天神彷彿去咗日本咁，除咗裝飾同格局，就連落單嘅販賣機，都好有日本feel。落完order，坐低就可以飲吓日本餐廳必備嘅凍麥茶，同睇吓日本電視頻道先！
別格牛丼飯
嘩，咁大碗嘅！飯好多，不過牛肉比例就少啲，但呢個價錢絕對係抵食嘅。一讚嘅係牛肉唔會太肥，食得相對健康。而牛肉汁係另上，鍾意多汁定少汁，悉隨尊便。至於麵豉湯熱辣辣，有齊海帶、魚乾同味噌，好有層次！
