【A&M Diary】A姐話難得放假，好想去賞楓打卡。今年雖然去唔到日本，但其實每年12月至翌年嘅1月中都係香港嘅紅葉季節，而最熱門嘅賞楓地點當然係元朗大棠啦！但A姐嫌大棠人多，又要行少少山路，如果你都有同感，不妨考慮呢個位於大埔烏蛟騰嘅紅葉秘景：九担租。
前往方法
1. 喺大埔墟港鐵站外嘅小巴總站，乘坐20R綠色專線小巴到烏蛟騰總站，惟班次疏落，約每小時一班，可參閱時間表
2. 喺大埔墟港鐵站外嘅巴士總站，乘坐275R九巴到烏蛟騰總站，服務時間只限星期日同公眾假期，10-20分鐘一班車
3. 我哋就選擇自駕遊，車可以泊喺村外免費停車場，不過車位唔多，先到先得
提提你
1. 落車後嘅路程只有10分鐘，亦係平路為主，但都要量力以為。起點有公廁，但沿路無任何士多補給站，所以大家記住自備所需用品
2. 大家記住保持環境清潔，自己垃圾自己帶走，絕對唔可以破壞大自然環境
九担租紅葉
落車後其實已經可以遠眺紅葉，之後往公廁方向行。繞過公廁，行多8分鐘，就會去到賞楓嘅地點啦！
一大片嘅紅葉林，真係好靚呀！更重要係人少之餘，啲紅葉夠紅又近，仲好密集添，A姐表示十分滿意！不過，喺紅葉林嘅後面就有啲墳墓，大家影相嘅時候唔好太過忘形喇！
同大家分享吓我哋嘅紅葉靚相啦！
