【A&M Diary】「2020年12月26日正午12點，呢一刻係屬於我哋嘅！」即係咁，雖然M佬同我講呢句說話係幾浪漫，但係喺烈日當空下，真係有啲曬囉！其實今日M佬帶我嚟到銅鑼灣海傍嘅怡和午炮，同我感受一吓呢個由殖民時期至今嘅傳統。
過去的怡和午砲
喺1841年，怡和洋行喺銅鑼灣興建渣甸貨倉，當時海盜猖獗，所以設立一座炮台對付海盜；而每次有大人物抵達或離開香港嘅時候，都會鳴放禮炮，以示敬意。直至1850年代，據說怡和洋行總經理Robert Jardine爵士由英國返到香港，員工竟然鳴放代表最高敬意嘅21響禮炮，引起駐港英軍不滿。最後，怡和洋行為表示歉意，就喺每日正午12點鳴放禮炮報時，以作自我懲罰。加上當時城市未有咁煩囂，維港兩岸都會聽到炮聲，表示上午工作時段結束。
但喺日軍佔港時，大炮被奪去，直至香港重光，英軍向怡和洋行送贈可發射6磅重炮彈嘅大炮，令午炮傳統得以延續。
今日的怡和午炮
喺1959年，住喺附近嘅居民投訴午炮炮聲過響，所以改為現存嘅三磅速射炮，而原有大炮安排放置在右手邊地上。
每日早上11:45，負責儀式嘅禮炮師會就會嚟到。直到11:59分，禮炮師會先敲四吓鐘，之後會裝好炮彈同調整發射角度，到踏正中午12點，Bomb一聲，真係好震撼，心都離一離！發射完，禮炮師會再敲四下鐘，儀式就正式完結。
鳴砲後就可以把握30分鐘嘅開放時間，大家可以入去影相參觀。原來近睇支大炮，係有一支“手槍”㗎！
