【A&M Diary】A姐同我講一個關於9年前嘅故事，當時A姐同佢嘅前度去咗西班牙旅行，佢仲越講越興奮咁分享旅程嘅點滴。係呀，我呷醋呀！雖然我無去過西班牙，但我同A姐有嘅係將來，就算依家無得同A姐去西班牙旅行，我都要同佢有西班牙嘅片段，所以我今日同A姐去咗食西班牙菜，嚟到銅鑼灣嘅Tapa Room，喺食嘅時候，就輪到我同佢分享我同前度嘅故事喇！
棒棒鵝肝
鵝肝以球狀呈現，入口即溶嘅鵝肝，夠香濃又細滑，一啲都唔膩。
薄切慢煮八爪魚
八爪魚厚薄適中，仲帶有淡淡海水味，加埋蕃茄蓉，食落好有層次。
西班牙薯仔蛋餅
呢個係一定要試呀！仲要盡快切開，因為會有流心效果㗎！切開蛋餅，軟綿綿嘅薯仔同流心蛋會流出，上面仲有沙律醬，味道豐富，係一道傳統嘅西班牙小食。
檸汁白酒煮蜆
蜆鮮甜又帶有白酒香味，加上檸汁，開胃之餘，其實配酒都好啱。
巴塞隆拿式烤紅蝦
A姐話呢個紅蝦係佢最愛，紅蝦上有炸過嘅香葉，擺盤非常靚！重點當然係隻蝦啦，蝦夠晒大隻，個蝦頭仲要勁多膏，真係多到爆出嚟，而蝦肉鮮嫩彈牙，配上醬汁夠惹味。
霹靂蜜糖烤慢煮法國黃油春雞
慢煮嘅雞肉真係好滑，連雞胸都唔會嚡口，雞皮香脆又可以鎖住肉汁，好juicy。
